2014年7月31日 星期四

逝去感情如何留得住.香港兒時玩意篇


想當年,小學假期應該係咁樣:
「媽咪!我要去公園反呀」
「唔得!做哂功課溫哂書先!」
「做哂溫哂兼執埋書包啦!」
「咁呀,玩一陣好啦,小心D。」
「知道!」
下一秒我已經無左影,呼~好一下來去如風。
再返黎現代,而家既小學假期可能係咁樣:
「媽咪!我要開電腦 / 電話打機呀」
「唔得!做哂功課溫哂書先!」
「玩完先啦!」
「咁呀,玩一陣好啦。」
可能呢一秒已經坐定打緊。

唔,時代變,生活方式的改變令我地慢慢忘記「想當年」?小時候反,多以群體活動為主。而家,大家都好像只活於自己的世界中。
但!我真係好懷念兒時玩意!不如睇下大家講唔講得出以下既玩意係咩呢?
公園篇:
1. 一掂到繩個下大家都會即刻變成齊天大聖孫悟空!
2. 想睇星星?唔一定要等夜晚!你轉多幾個圈日光日白都可以滿天星星!
3. 呢樣野要搵岩對手先好玩!你「Over」過人地,你就可以掌握控整個遊戲玩法,仲有機會成程恥笑人。相反,如果你「Under」人地,縱然心中有一萬個不滿,但都好樂意繼續被人玩弄於股掌中。拿!同一Level既,咁咪大家一齊Patpat開花!
4. See me fly i’m proud to fly up high~想飛?無難度!
5. 有兩種玩法。正常個種係中間穿過去咁簡易。唔正常個種係由上面出發,你可以坐係度轉轉轉又得,企係度當自己係劉翔咁跨到下一個都得!(我多數都係玩唔正常個種)
6. 包剪揼進階版(可能同後面既「包剪揼喘氣版」好似!但係唔同架)
小玩意篇:
1. 想做蝴蝶定變火箭?問個自己隻手指先!
2. 多數都係女仔先會玩,因為要講求手指既靈活性。同埋一定要兩個人玩,講多小小,係用任何長小小既繩都玩到。細個會時不時帶住條繩出街同人「挑機」!
3. 包剪揼喘氣版
4. 四坐山,四個方向,八個決定
5. 位位都會幻想自己係神射手!不過好危險好易整親人!
6. 「何~何~何~何~何~何~何~何~」「喂!你無哂Quota啦喎!」
7. 一條小手巾就可以定「情」?唔係,係定生死者~
8. 張學友 + 陳奕迅:沒錯大戰差點觸發過~他與她爭拗後果各有各突然離座~
9. 橡筋逐個穿,全人類一齊跳!
10. 123456789……拍拍拍!愈快愈好,愈痛愈要玩!噢!你數錯!
11. 單腳跳,雙腳落地。又再跳過!

諗唔諗到?!開估啦!
公園篇:
1. 繩網陣
2. 氹氹轉
3. 搖搖板
4. 韆鞦
5. 蛋卷山洞
6. 樓梯上的包剪揼 - 贏左既就可以上一級,輸左既唔好意思,下一round!終點見!
小玩意篇:
1. 橡筋定生死 - 每次只可要求放開一隻手指,到最後會出現蝴蝶或者火箭咁既形狀。蝴蝶代表女仔;火箭代表男仔。你仲可以玩前指定某一形狀會有咩結果,睇下最後自己中咩。(其實我唔記得叫咩名...有無人知???)

2. 翻花繩 - 兩個人運用自己既手指,前後左右咁穿梭移動,從一個人既手指上正功移到自己手指上。最後移唔到既就輸!
翻花繩
3. 用腳玩既包剪揼 - 包.剪.揼分別都有一個步法代替,跳下笑下咁就一日。
4. 東南西北 - 用紙摺出黎,入面八個邊都寫滿想玩人D咩,人地揀中就要跟住做。
東南西北
5. 丫叉 - 要玩記住去空曠地方玩!
6. 何濟公 - 呼之欲出啦呢個~
7. 掉手巾 - 手巾會放係其中一個坐係度既人的背面,佢發現之後要捉到掉手巾個個先無事。(報仇好時機!)
8. 天下太平 - 放心!唔係唱歌!係俗稱「飛機大砲」既遊戲。用紙、筆同擦膠就夠抽!目的係要擊潰對方既堡壘!殺呀~!
9. 橡筋繩 - 以前唔敢叫老媽子買繩,咁唯有自製囉。最鍾意草定唔同色既橡筋,穿完特別靚!跳都跳得開心D
我跳!
10. 黑白 - 有時快到個口跟唔到個手
11. 跳飛機
仲有好多好多玩意,唔知大家仲記得幾多。
兒時遊戲,簡簡單單一班人,笑下你,打下你,癲下咁就一日。成班人不分你我,仲唔使錢!不亦樂乎。
到底科技進步係好時定壞事...?
人與人之間既相處同接觸可以好容易、簡單。同時,亦可以難過登天。
時代巨輪往往會扼殺、摒棄既有傳統、舊事。但「逝去感情如何留得住」?
***
大家仲記唔記得「大笪地」?!雖然因為種種原因令香港呢個其中一個特色已經不復存在,但我仍希望有朝一日,佢可以重新出現係香港社會...仲有公園入面既懷舊設施。

U Blog 窮看世界。噢耶!


2014年7月29日 星期二

後現代背包客。全新出發


我, 成日會想以Think out of the box既思維去為自己人生旅途畫上不平凡的終結。新手上場成為背包客時,就被灌輸某幾項backpacker既有的特色:住Hostel、要窮遊、揹大 包、寫一大推postcards、打卡、係無腳同獨行俠既...等等。可惜,細想旅程終結後,心靈好像還未被填滿,我就知道我想要的旅程並不只是如此。所 以!我決定成為「後現代背包客」(唔好意思,我自作的)!用自己所謂既「新態度、新方式」繼續餘下的旅程。

1. 每日之遊記
既記憶會隨住時間而淡化,繼而遺忘。無論你昔日既旅程有多驚心動魄、盪氣迥腸,總有一日即示你對住照片亦會說不出那天的感動從何而來。所以我每次的旅程都 會帶一支筆同朋友送我那本自製的記事薄,堅持無論有幾攰都會寫底當日遇過既事情。希望我可以盡快開第二本!(車!咪即係日記,好多人都會寫架啦!你又岩。 但遊記呢家野,噢耶~)

2. 會說話的照片
時候扲住以底片為靈魂既相機影相時,家母不時話:「唔好亂影丫!曬相好貴架!」但我永遠唔會聽佢講,仲最鍾意只係影景唔影人,呢樣野家母到依家都不明所以 點解我只係曬得景無人既相。除左鍾意曬相,我更喜歡係相既背面寫底張相係邊影,同憑記憶寫低當時既感覺。我希望到我年老時,照片會跟我訴說當年情。 
3. 港版異地postcard
個係源於曬相既「後遺症」。我愛拍照,更愛沖片得來的相片。忽發奇想:喂!點解唔可以將自己影D相當Postcard咁俾朋友先?!所以,回到港我都喜愛 不時曬完相就將之當postcard咁係背面寫字再俾朋友們 (不過我都係會寄異地版postcard),分享我既經歷。我仲想買部即影即有影時寄!噢耶!

4. 給自己的情書
除了寄postcard俾朋友,大家不防寄返張俾自己。返黎睇返自己給自己的情書後,你的眼角會不期然地充滿淚水。
5. 一夜情
放心。我無咁開放。意即係同一天空下,係不同地方仰天對望,景色都不盡相同。大家不防旅程中找一晚,與晚空談談情,再用相機將整個過程紀錄落黎。異地星空、月亮、小夜燈與一個流浪中的背包客,此境何處尋?!

明月高高掛
6. 獨樂樂不如眾樂樂
能否認,我享受一個人的旅程。我也不否認,我會繼續一個人的旅程。但,我開始學習與家父一同享受同一個旅程。他跟我一樣也愛看世界,但自從幾姐弟出世後, 他的世界都變得細小了,小得只容下一個家。而我長大了,我的世界也隨之變大,大得不想有盡頭。同時,我希望還老爸一個大世界。所以,希望大家襯家人還四肢 健全,行得走得仲捱得時,讓他們融入自己的世界,並一同向世界出發。這一年,我帶了家父出走雲南.香格里拉。我看到他的世界重新添上色彩。我們的下一個目 標就是西藏.拉薩。


背包客們,不管你是否認同以上的態度或方式,又或者你自己已經找到可以滿足自己心靈的旅行方式,請謹記無論旅途的開始、途中或是終結,我們希望得到的不只是那過眼雲煙的風景與捉不緊的回憶,而是那份靠自己在旅程中默默記下才得以保留的「人生自傳」。

U Blog 窮看世界。噢耶!