逝去感情如何留得住．兒時零食篇

有時，總會好懷念當年買M記廿蚊就有找既年代。並唔係因為鍾意食M記，而係鍾意當年即使扲住5毫或者幾蛟雞，都可以買到好多唔同既零食返屋企「豪」下。而家物價係咁漲，荷包就係咁縮，真係．．．Anyway！唔知大家又對當年既零食又有幾多印象呢？

1. 男前一丁 (以前係咪呢個名??????)
記唔記得開左後入面係咩呢？係一粒粒好細粒既糖！入口即溶，雖然唔可以媲美雪榚個種透心涼快感，但已經陪伴我整個童年時期。

2. 印水紙香口膠
細個時候，睇電視覺得有紋身既人除左係壞人，心裡不禁會對佢地有一種肅然起敬既感覺：好型、好威呀！為左表現自己都好威，從此愛上呢粒香．口．膠！有多種紋身公仔任均選擇！但要睇下自己手氣抽唔抽到自己想要啦！(重點唔係香口膠本身，係張印水紙！)

呢隻都唔係舊款，只係大概咁既樣！當然係冇印水紙架啦！

3. 吹波膠
激甜、激快無味、激難吹到波既吹波膠，有多種水果口味選擇。而家食返，都唔知自己點解當年會咁鍾意食！哈哈！

4. 識響既哨子糖
唔識吹口哨追女仔？唔緊要！有呢粒哨子糖就無有怕！只需要擺係個口度，對住中間通窿起勢咁吹就得！要有幾大聲就幾大聲！

5. 戒指糖/唇膏糖
「我向你求婚～求你應下承～」如果求婚時真係扲呢粒糖出黎真係幾好笑！我應該會感動落淚！仲有搽唇膏唔一定要唇膏既，搵支唇膏糖搽下啜下，包你個紅唇甜蜜蜜！

6. 眼鏡朱古力
想做朱古力掌門人？得！將排眼鏡朱古力擺係對眼度就得啦！而家都唔知邊度有得買啦！變唔到身！
7. 綠箭
而家通街都係唔同牌子、唔同味道、唔同形狀既香口膠，但無一隻可以同綠箭香口膠同儕(係我眼中)

8. 媽咪麵
現有shake shake薯條，舊有shake shake媽咪麵！我仲好記得當年既廣告架！大家仲有冇印象？仲有就係會愈食就覺得愈鹹！所以之後我曾經進化到將佢當成公仔麵咁煮黎食！又OK喎！

9. 唧唧冰
熱辣辣，細個就最鍾意扲住支唧唧冰係咁啜！但我搵唔到好似葫蘆形個隻呀！知唔知我講邊隻？

呢隻唧唧冰唔係我最鍾意個隻！

無可否認，而家市面上有著各式各樣既新款零食，味道亦都好不錯。但，我更愛兒時零食。總會計住計著，到底5毫子買到咩、草幾多個5毫子又買到邊款較特別既零食。更重要的是，除了懷念它們的味道，我更懷念當年兒時的回憶及人情味。這是任憑現在哪隻新款零食都取代不了！

你呢？你又最愛哪款零食？

逝去感情如何留得住．香港兒時玩意篇：
http://blog.ulifestyle.com.hk/blogger/backpackersopoor/?p=2053669

Facebook專頁：https://www.facebook.com/backpackersopoor

U Blog： 窮看世界。噢耶！