2014年9月24日 星期三

背包客的背後

背包客的背後,不只是背著一個大背包,而是背著一個夢想。
一個偌大卻又不可放下的夢想。

背包客的前方,不只是抱著一個小背包,而是擁抱著一個未知的世界。
一個繽紛卻又充滿著危機的世界。


背包客,也不過是一個平凡人。
會打文的背包客,也只是一個會打字的平凡人。
平凡人的七情六慾,也會肆虐背包客的腦袋。
電腦屏幕前,大概總是背包客勇敢與戰勝悲觀情緒的一面。
電腦屏幕後,在未知的前路當下,背包客也不過是會鬧情緒的小旅客。


遇上霎時間應付不來的難題時,無助感油然而生。
在那個陌生的異地,這時到底可以依靠誰?有人會伸出雙手把我扶起嗎?

當明白到這刻身邊並沒有人可以從旁協助你,驚惶感突然湧出心頭。
討厭自己為何可以這麼脆弱,眼看別人卻迎風而去,處變不驚,那刻平凡的背包客自卑自憐起來。

拼命地背著夢想,抱著未知的世界,值得嗎?

背包客在這個萬千世界,漸漸迷失了。
分不清下一個世界的出口在何方,獨自地在原地轉著轉著。
這個該死的死胡同。

含著淚,耍著平凡人的壞脾氣,狠狠地拋下一句:老娘不幹了!
然後?真的就這樣放棄嗎?
我不甘心,亦不相信這就是故事的結局。

背著夢想的背包客可以休息,但不可以停下來。
時間不會跟著自己的步伐而停下,也不要奢望時間可以重來。
時間,其實沒有Take two。

呼~雙腳和大腦休息夠了,是時候起程,繼續踏上未知的路。
其實,軀使著背包客前進的,也是背後背著的一個夢想和前方擁抱著的一個未知世界。


值得與否,沒有標準。皆因每個人背著的背包,抱著的小包,裡頭裝著的也許不盡相同。
只要自己認為值得,就不要輕易把它放下。

Facebook專頁:https://www.facebook.com/backpackersopoor
U Blog: 窮看世界。噢耶!

2014年9月22日 星期一

Nothing is impossible!

身邊好多朋友都鍾意時不時就潑下我冷水。
無計,可能我太鍾意講笑,無厘認真(咁既樣),亦都有太多古怪念頭。
同時,我認我自己咩都想試。

噓~人生有幾多個十年?而家唔做,第時後悔都無謂。
我覺得。

有人話我:
唔好玩啦!未試過自己一個去旅行,就要去歐洲backpack成個月,俾人食左都唔知咩事。
你無病呀?一個女仔住mixed dorm(男女混合房),你係咪嫌命長?
咩話?只使萬二蚊去歐洲一個月仲已經包埋機票?!你發完神經未?
我頂你...腸胃炎你邊有力行呀,同我留返係hostel!
著拖鞋行山仲要手腳並用咁爬上去?你痴左邊條筋。
唔係嘛,凌晨三點行兩個車站為左搭平價eurobus?
寫旅遊blog?睇你都係寫一陣就玩完架啦。
(仲有好多好多...)

或者經歷過既你可能覺得以上都不過係雞毛蒜皮既事,亦會變成理所當然當既旅行小習慣。
而無試過咁做既你,或者會覺得自己無可能會做到(亦唔需要咁做)。

但若果一開始已自我否定,任憑全能神人都永遠唔會做到。
因為,你連第一步未踏出去,就已經縮返隻腳入黎。

當選擇放棄時,大部份原因係源於對未知既前路感到驚恐,甚至缺乏安全感。
係完全無經驗同前科既情況下,大腦就會出現一個訊息:未試過,停一停,諗一諗。你得唔得?
到停左又諗完,成件事好易就close file。

你又可以話,咁即係唔好諗太多,想做就做,咪又即係衰衝動,做事唔諗後果。
YOU ARE RIGHT!
不過,青春時唔衝動,再待何時?
況且,需要用衝動去做既事,又係咪真係咁十惡不赦? (當然唔係叫你去做有違良心既事)

別人笑我太天真 我笑他人太悲觀
Impossible? Then makes it possible.

容我係呢個小小既空間分享我小小既喜悅。
望我呢個小小既經歷去激勵大大既你們。

有人笑我成廿幾歲人先學游水,無咁容易,亦好難會學得成。因為人大左,知道個死字點寫。
但想學游水係因為我想去有美麗海島既地方可以魚兒魚兒水中游。
我唔識飛,但我希望可以感受係海中自由自在既感覺。
所以上年我終於的起心肝去學游水;今年我亦終於可以唔識靠水泡都可以係海灘度暢泳。
(噢耶!我感受到做魚既感覺啦!)
而上星期,我竟然膽粗粗咁參加左個4 x 400米接力比賽。
結果,唔重要,重要既係我成功挑戰到自己。(隊友們辛苦哂!)
當然,游之前亦聽到:你得唔得架?海灘黎架喎?堅架喎?

我,都係堅,唔係流。

你,你,你!由呢分鐘開始就同自己講,無野係無可能!
下一個背包客,可能就係你!下一個成功挑戰到自己既人,亦都係你自己!而下一個不可能,唔好意思,我睇唔到。


Facebook專頁:https://www.facebook.com/backpackersopoor
U Blog: 窮看世界。噢耶!

2014年9月19日 星期五

為何值得愛上會獨自遊世界的女生?

以往經常有調查顯示,某幾種職業的女性特別受男士歡迎。計我話,無論職業是什麼也好,最重要是:態度決定一切。

雖然不能肯定所有愛獨自遊世界的女仔都有討人歡喜的性格和態度,但我相信nothing is impossible。正找女朋友的你,不防留意「獨行女」,她們的浪女性格或者很值得你去愛。

1. 瀟灑不羈
輕輕的我走了,就如我輕輕的來。獨行女做事從來都不靠譜,突如其來的想法和行動,或許會令對方無時無刻都有意外驚喜。

2. 自由奔放
喜歡獨遊的其中一個原因大概是喜愛自由的感覺。對於視自由如命的女孩,當然也明白無論一段關係有多親密,也需要適當的自由空間。所以,獨行女也不會常黏著另一半,男生也不怕拍拖變成坐監。

3. 敢愛敢恨
憑著旅行中那天不怕地不怕的精神,獨行女做事也會有勇者無懼的態度。放膽去做每一件事,但求無悔。愛會愛得很深,恨也恨得很徹底。

4. 出得廳堂
雖然並不能肯定是否入得廚房,但一定出得廳堂。我指的不是樣貌上,而是談吐上。也許旅行時已經習慣與陌生人侃侃而談,也懂得如何找到話題。所以男生帶女朋友聯誼時,一定不會怕獨行女悶或沒有共同語言。

5. 無窮精力
愛漫遊的女生總會充滿著無窮的體力和好奇心,以驅使她們繼續前進。如果男生們愛戶外活動,獨行女絕對願意陪你一路向東南西北。

6. 獨立能力
要獨遊必先學會獨立。獨自遊世界時,大小事務都只能靠自己,因此獨行女往往會變得不需太依賴別人。這樣,男生就不怕需要為女生決定或處理所有事啦。

7. 細心細膩
一人遊時總需要細心觀察周邊事物,除了要發掘別人看不到的景物,也要注意自身安全。久而久之,細膩的心就這樣練成,造就懂得如何貼心照料另一半。

8. 風趣幽默
不能否認,獨自遊世界時總有納悶的時候。因此,有限度的自娛是必要。同時,當看過了世界後,人也會變得靈活風趣一點,想法也更新鮮,言論間不難會爆出幾句驚人語句,古靈精怪的念頭,令人哭笑不得。

9. 堅毅不屈
有了旅遊目標,便會堅定不移地向著終點進發。哪怕要等多久、過程有多艱苦,終究也阻不到獨行女的意志。同時,只要愛上對的人,無論期間出現多少問題,都絕不會容易放棄。直到順利跨越難關,到達終點。

10. 樂天知命
獨自旅行時,總會遇到不同的經歷。快樂與痛苦交集,促使我們明白到「知足常樂」。獨行女想用的不過是簡單的快樂。而兩個人一起,不需要驚天動地的愛情故事,只需要細水長流的愛情長跑。

Last but not least: 獨行女給你整個世界
「我不能給你整個天空,也不能給你整個海洋,但卻可以給你整個世界。不喜歡遠遊的你,我可以和你分享我的旅行經歷,讓你從我的敘轉述中認識整個世界;喜歡遠遊的你,我可以與你一同踏遍整個世界,讓我們的回憶散到每一個角落。」也許有天,同樣愛上了你的獨行女會跟你說這番說話。你會願意嗎?

無論你同意與否、可有共鳴,或者現實是否如此,其實愛一個人不需要有太多的理由。也許他/她的性格與自己南轅北轍;也許在別人的眼中,對方不過是平平無奇;又也許你們的關係得不到別人的祝福。但其實只要感覺對了,就應該放膽去愛。

當愛上了對的人,就如獲得了整個世界。


Facebook專頁:https://www.facebook.com/backpackersopoor
Blog:http://backpackersopoor.blogspot.hk/

2014年9月17日 星期三

唔好意思,結婚可唔可以唔擺酒?

純粹有感而發。

雖然自己未到適婚年齡,但身邊都不乏親朋好友喜事近,陸續派「紅色炸彈」。
不過,我為朋友們擔心呢個炸彈未到擺酒個日,男女主角已經率先「自爆」。

本來結婚應該係開心事(亦都當然係),之不過就係因為擺酒呀、行禮呀等等既傳統禮節,好易攪到四方爭持不下。邊四方?咪就係雙方長輩對峙同長輩與新人對峙。四方各有各道理,真係天先知該如何決策。

爭論一:結婚應唔應該擺酒
新人:結婚係兩個人既事,我地只係想請比較熟既朋友一齊食餐飯。好似Party形式咁,就係咁簡單。而且想慳返筆錢。
長輩:結婚唔單止係兩個人既事,而係兩個家族既事。梗係要做得好好睇睇,唔好俾鄉親父老、兄弟姊妹朋友有微言。

爭論二:敬茶行禮要分別係男女家進行
新人:我地雙方既屋企都好細,又有寵物係度(仲住得好隔涉)。如果咁多人上黎會好唔方便,不如Book酒店啦。都一樣啫。
長輩:唔好開玩笑啦!即係對方唔俾你入門啫?!

爭論三:擺酒個日應該換幾多套衫
新人:(女)著一套得啦!唔想換黎換去咁麻煩。
長輩:至少都兩套啦!迎賓同送客都同一套好寒酸架。我都要兩套,如果唔係人地見到,你地(新人)會好無面架。

爭論四:擺酒人情應該點分
新人:你地話事啦...
長輩:最重要係男家/女家佢地想點分先?!(但無論點分,一定會有後話)

爭論五:擺酒個晚要帶哂所有金器上身
新人:唔使啦!帶哂上身又重又唔係靚,仲好唔方便。
長輩:梗係有幾多帶幾多啦,人地睇到都覺得你嫁得好啦。

或者仲有好多唔同既爭論我仲未領略到,可惜已經聽過不少新人係準備擺酒事宜期間大叫:我唔嫁啦!/ 我唔攪啦!然後當然係淚流滿面咁,再繼續諗點樣拆掂佢。

其實,結婚有無必要要攪到咁複雜?雖則我認同結婚唔單止係兩個人而係兩家人既事,有需要顧及到雙方家長既意見。但同時,結婚亦只係屬於兩個新人既人生回憶,其他人又有無必要要將自己一套既有既傳統或價值觀硬套入去呢?一邊覺得擺酒係做一場大龍鳳,請一班自己根本唔識唔熟既人好無謂。另一邊又覺得擺酒係必須要有既習俗,對面子好重要。

說到底,無論你係新人又好,長輩又好,舊一套未必適合新世代既夫妻,而新思想老一輩又未必接受到。咁不如攪之前,唔好怕得失對方又或者怕尷尬,三口六面講清楚大家想點,好過日後唔知兜左幾多過彎,喊左無數次先成事。

唔想擺酒既你,不妨問下:唔好意思,結婚可唔可以唔擺酒?
應該唔會小左忽肉...掛?



Facebook專頁:https://www.facebook.com/backpackersopoor
U Blog: 窮看世界。噢耶!

2014年9月16日 星期二

旅行必備良品

「噢埋吉!個喼唔夠大裝哂D野!」

不時都會聽到朋友向我訴苦,其實計我話,去旅行最緊要帶passport同身份證外,其餘需要帶既其實係...

1. 滿腔熱血
有時去旅行只係需要一份衝動。行前諗太多,反而會被滿腦既所謂uncertainties而破壞整個旅程。去吧!用那般青春熱血伴你完成整趟旅程!

2. 大無畏精神
唔驚!唔緊要!無有怕!出得黎行預左要「闖」。唔好驚行小路唔識出返去;唔好驚同陌生人傾計;唔好驚去試自己從未試過既東西...其實真係無咩野需要驚!

3. 探險細胞
請拋開手上既旅遊書,用自己既雙腳寫出不一樣既探險經歷吧!唔好跟旅行書,嘗試問當地人又或者誤打誤撞,探險一番,踏入未知既路程並將之成為自己專屬既旅遊天書。

4. 「好客」之道
無論你去到邊都好,做一個「好客人」。基本既禮貌同懂得融入別國既文化係基本常識吧。除左咁之外,你既「好客」之道分分鐘會換黎意想不到既「待客」之道。

5. 親切笑容
「笑」無論係咩場合都好岩用,特別係旅行途中。佢可以係一個開場白,亦可作為求救輔助表情。最重要係,笑一笑,隨時為你結交到五湖四海既朋友!

6. 感激與寬恕之心
要識得感激旅途中曾經幫過自己,為你付出過小小綿力既過客。因為佢地,你既旅程先會變得更豐富。同時,你亦要學習寬恕曾經欺騙過你,「作」過你一獲既人,佢地令你上左一堂珍貴既課。

7. 永不言敗
遊歷時,你或者會遇到好多非自己預計內既突發事情,例如俾人偷野,病左,迷路,天氣不似預期等等,而攪到好沮喪,甚至覺得「為何偏偏選中我」之感。但其實呢D不過係旅程既一部份,當想放棄既時間,要同自己講:若選擇開始這趟旅程,哭著也要把它完成。最後,你會發現自己比想像既得到更多,體會得更深。

8. 希望在明天
也許今日既旅程仲未觸動到心底深處既悸動,此時你要相信明天會更好。

喂喂,你帶左未?
Facebook專頁:https://www.facebook.com/backpackersopoor
U Blog: 窮看世界。噢耶!

2014年9月13日 星期六

屬於香港人的尖沙咀

有人話:尖沙咀已淪陷。
亦有人話:來日不到尖沙咀。
原因:無他,皆因尖沙咀地上遍地黃金。噢!唔係,係「蝗金」先岩。
聽罷,心有點戚戚然。
腦海突然倒帶回到還是黃毛小女既時候。
「嘩!(指住格渡輪)媽咪好大呀!佢會去邊架?」
「媽咪唔大,呢格船會載住你過到對面海,去到香港既另一邊。」
我瞇著細小雙眼,遙望對岸,心想:係時間叫媽咪搵雪榚車買雪榚...
然後,雙耳豎起,找尋著雪榚車音樂。
仲有小時校園指定活動:參觀科學館、太空館;香港文化中心聽音樂會;歷史博物館睇專題展覽,之後請交報告!而每逢節日,成家都一定會搭98D去尖沙咀睇煙花,睇燈飾行海傍欣賞日落。
好,場面極速轉去21世紀尖沙咀。
「Excuse me, where is the Avenue of Stars?」
「對不”起r”,我想”問r”那個海港城怎樣去呢?」
如今我不再發問而係解答問題,而問題都係圍繞著點去點行同邊度。
但有幾多旅客真係知道邊度係菠蘿包;半島酒店年年既聖誕燈飾都係星星;鐘樓以前唔係真係得一幢鐘樓;曾經屹立於尖東既新世界中心係香港人既集體回憶;「一個海港,只有一個海港城」呢個城大到連香港人都唔未必太識行;雪榚車多數係邊度橫行;甚至沒女曾經係度出沒表演過。
無論每年每日有幾多遊客黎到尖沙咀,陪伴住佢改變既都只會係香港人。無論遊客有幾喜歡尖沙咀,最後都只會輕輕的來輕輕的去。無論尖沙咀點變,都只有我地最清楚佢既生路歷程。無論尖沙咀路上有幾多個巴仙既外國人士,佢永遠都係屬於香港人既尖沙咀。無論尖沙咀日後點發展,都唔可以淹沒應有既香港本土文化特色。
因為香港,只有一個尖沙咀。
而尖沙咀,只會屬於香港人。

Facebook專頁:https://www.facebook.com/backpackersopoor
U Blog: 窮看世界。噢耶!

2014年9月12日 星期五

因為出走,所以明白

獨自出走的那一天,我以為自己很了不起,畢竟身邊從未遇過友人如我這般。
獨自回來的那一刻,我為有過此想法慚愧,畢竟世界之大獨行旅人比比皆是。
看著別人的遊記,聽著別人的故事,欣賞著別人的照片,除了佩服還是羡慕。
期間不禁暗自比較,自覺所謂的「戰績」不過如皮毛,比起那些為夢想、為寫下不平凡人生、為忠於自己感覺而瀟灑地說走就走的旅人,我什麼也不是。
我帶著自卑的心繼續到處尋覓,希望有天我可如他人般,擁有數不完的旅遊經歷。
然而,我遇上一個旅人。
這個日本男生,花了前半生的時間一直追追趕趕,追著別人的銷售戰績,也趕著公司的銷售指標。一天醒來,驚覺自己年過三十,卻發現未曾真正地活過,前半生,靈魂已死。每天也活在別人的影子下,跟隨著別人的故事而走。他再也想不起真正的自己是如何,到底為了什麼而活下去,也記不起何解要跟別人比較。然後,他決定下半生要為自己而活而不是他人,需要比較的是前一天的自己而不是別人,他立志要活得比上一天更精彩。工作辭退了,這個從未出過國的日本男生毅然飄洋過海,走向未知的國度。他驚訝於世上為自己夢想而活的人何其多,也感嘆自己浪費了前半生去追趕沒意義的比較。
因為出走,所以令他明白每個人都是獨一無二。也許別人比自己活得更多采多姿,又也許別人的遊歷模式比自己來得更特別,但這都是別人的人生,我們要做的是如何令自己的今天比昨天活得更美好。
香港地,無論三歲定八十,總愛拿自己跟別人比較。
我的玩具比你多;我的學校比你出名;我的收入比你高;我的職位比你大;我的家比你寬敞;我的家底比你厚;我的英語比你好;我的體重比你輕;我的朋友比你多;我的子女比你的更生性…香港人,什麼都愛比較。但為了什麼而比較?
那天,我失落了好一陣子。我痛恨自己為何要活於無意義的比較中。我更痛恨自己扭曲了當初出走的原意。出走,是為人生寫下一頁又一頁只屬於自己,獨一無二的回憶,而不是與別人比較遊歷的多寡。
也許上一秒的你正拿他人跟自己比較著,又也許此刻的你因比不上別人而失落,但請你記住,沒有比較的理由。人只活一次,也只為自己而活而不是他人。
因為出走,所以迷失。
也因為出走,所以明白。
杯中的夕陽比天上的夕陽
杯中的夕陽比天上的夕陽

Facebook專頁:https://www.facebook.com/backpackersopoor
U Blog: 窮看世界。噢耶!

2014年9月9日 星期二

特塞爾-夢想中的伊甸園

荷蘭,大部份人第一時間諗到既不外乎紅燈區,風車,芝士,單車同毒品。諗到既地名就圍繞住阿姆斯特丹,鹿特丹同海牙。但有個地方對香港人黎講就仲好陌生,至少我好少聽人講過。不過,對於荷蘭人黎講,呢度就係佢地既渡假天堂。

Texel特塞爾 - The garden of Eden 夢想中的伊甸園
位於荷蘭北部既一個島嶼,總面積大約470km2,相等於半個香港再細小小,但人口密度只有85/km2,香港係佢既差唔多80倍!「噢洩」!所以去到你可能會有一個想法-死左都無人知。(我啋!) 我試過行左成個鐘人影都唔見一隻,見得最多既反而係羊。所以我講得最多既係:咩~~~
想真真正正地遠離煩囂,並提早體驗退休生活,特塞爾幫到你。係呢度你會覺得自己好似與世隔絕,並唔係因為與外界失去聯絡,而係島上既人真係好少,你絕對唔會有係香港日日成為沙甸魚既感覺。加上環境太過優美,依山傍水,你要我係度做農夫我都會應承。
可以係田野間起舞;馬路中狂奔;羊群裡穿插;山坡上吶喊。到底呢度係現實世界定夢想中既伊甸園?
船上可近距離中頭獎
船上可近距離中頭獎
死在此地也不枉
死在此地也不枉
係度打籃球真係爽到震
係度打籃球真係爽到震
IMG_4490
花田
花田
住係度應該好幸福好開心
住係度應該好幸福好開心
前往燈塔之路 行左一個鐘都未到... 我班尾班車呀!!!
前往燈塔之路
行左一個鐘都未到...
我班尾班車呀!!!
最後只可對它說:再見你條尾
最後只可對它說:再見你條尾
碼頭,真係好唔捨得!
碼頭,真係好唔捨得!

前往方法:
前往該島最普遍既方法係搭船。從Den Helder碼頭乘坐由Royal TESO經營既船需時約1小時,票價為2.5歐。值得一提既係,格船大到除左可以裝人,最勁係可以裝埋貨車!同時,特別到上左船同開左船你都唔知。真係未到達先興奮!
(網址:https://www.teso.nl/en/)
我相信呢格係非一般既輪船
我相信呢格係非一般既輪船(船內部)
地理環境:
大 致上可細分為9個村莊:Den Burg,De Koog, Den Hoorn,Oosterend,De Cocksdorp,De Waal,Oudeschild,Dennenbos同Eierland。當中Den Hoorn係渡輪港口,而最繁榮既村落就係Den Burg。平均每條村慢慢行既,大概1-2個鐘就行得完。
(網址:http://www.texel.net/en/)

島內交通:
如 果你識踩單車而體能又有番咁上下,我建議你踩單車環島遊。沿途有好多好美麗既風景好值得踩踩下就停低慢慢欣賞。不過唔想踩單車都唔緊要!島上面有格巴士係 環島巴士,循環線。但唯一問題係每個地方隔1個鐘左右先有一班,而且服務只去到大約夜間7點左右,即係話你miss左一班車就要係到等1個鐘先有車,你 miss左尾班車既話,恭喜你,你有機會同人講:Can you give me a ride?

住宿:
如果你想住hostel既話,我介紹Stayokay Texel。皆因島上可以住既hostel真係無咩可以選擇。而呢間無論早餐同環境都非常不錯!

順道提一提,如果你想慢慢地感受特塞爾既寧靜同半退休生活,我建議你係島上留3日2夜,好好俾自己雙眼享受大自然既震撼美。但自問自己頂唔順慢活生活,咁2 日1夜已經足夠。要註明既係,因島上商店同餐廳唔多,而且好早休息,夜晚個餐最好買定材料返hostel煮。或者好似我咁,買定乾糧啃吧!


 
打算去荷蘭既你,不妨造訪下呢個世外桃源。

Facebook專頁:https://www.facebook.com/backpackersopoor
U Blog: 窮看世界。噢耶!

2014年9月6日 星期六

旅行唔要WIFI要HIHI

繼續閱讀下文之前,首先問自己三條問題。
1. 去旅行一落機,會唔會慣性開手機手搵下機場WIFI上面書,打下卡?
2. 去到酒店或hostel,check-in完慣例會問「有冇WIFI / WIFI密碼係咩?」
3. 係旅程途中唔識路,你會選舉用GPS導航多過用人地把口導航?
如果三條問題你都係答:有/係呀/Oh yes!
噢!恭喜你!因為你已入選成為「Smart Phone旅人」- 旅行時不期然都會有鋪上網癮。
如果只係中1/2條或者無中過,恭喜你!因為你未夠資格成為「Smart Phone旅人」。
不能否認,WIFI確實係旅行期間帶黎好多方便。可以同家人報平安唔使錢,上網搵旅遊資訊或即時訂Hostel話咁易,甚至用google translate同當地溝通,省略好多不必要既手劃劃口嗡嗡時間。但!試諗下以前去旅行無WIFI既日子,其實又咪係一樣,完.全.無.問.題!所以我有時唔太明,點解身邊朋友一遇到無WIFI既地方會出現:恐懼、浮躁、不耐煩等現象。
「點解無WIFI架?!」「上唔到網呀!」...
我當然都有一部「時媽瘋」。但旅行期間佢對我黎講,可以話係疏到無朋友既兄弟 – 如非必要,勿見。
去旅行要學識享受無電話煩憂既時間,亦要重新學習沒有網絡世界既日子。
到達機場時,習慣先體會當地人和物同香港到底有咩唔同,再向異地天空Say個Hi。
去到hostel擺底行李後,唔好即開WIFI,試下主動向同房打聲招呼,可能無意中多左個個伙伴。
搵路時唔好靠GPS,相信路在口邊。
返到hostel後,同其他人share自己旅程中所見所聞,正所謂:四海之內皆兄弟。吹水?無難度!
WIFI? Why fly?
其實係要同世界say HI,唔係同WIFI講HI。
噢耶!齊齊熄左個WIFI!
抬頭望下路邊,望下個天,佢地同你say緊HI!
Facebook專頁:https://www.facebook.com/backpackersopoor
U Blog: 窮看世界。噢耶!

2014年9月3日 星期三

沒有終點的旅程


每一次的旅程,都會有終點。
無論是工作假期、渡假或是流浪去,你總會知道終點大概在哪。

但只有一個旅程,你永遠預計不到終點在哪兒,何時會停下來。
這個旅程就是 - 人生。

「人生就如旅程,旅程堆砌人生。」
























自出娘胎後,人生這趟沒有終結的旅程便正式開始。
小時候的旅程你也許沒有太多回憶,只感受到一路上無論遇到什麼問題,總有人會默默在身邊為自己解決疑難,遮風擋雨。外面的世界很大,但你所接觸到的近乎零。然而,這段時期的旅途是最舒服,最沒有牽掛,最沒有煩惱。

旅程輾轉間已經過了十多個寒暑,旅行的模式亦開始出現變化。雖然每天的行程大概日日如是,千篇一律,不過時間老是不知不覺地溜走了。當中印象最深刻的景點只於各式各樣的考驗,成敗與否,過眼雲煙。這段日子的旅程我們亦慢慢學會了如何面對突如其來的困難,獨立的細胞亦從中蘊釀著。

走過了廿多年的旅程後,我們開始明白到世界大得可怕,時間卻小得可憐。人生的一個新階段、新旅程卻令我們想為求達到探索世界的目的,開始為自己人生添上一個又一個沒有第二次的偶爾旅行。我們或會選擇放棄既定生活模式去追尋夢想;或會計準時機,逃離令人窒息的空間,找緊時間了解世界更多;又或會選擇停留在熟悉的環境,用雙手為自己鋪設一條不平凡的路,希望再踏上人生另一個旅程。也許,我們在這次旅行中變了很多,變得更複雜、更不安份守己、更想衝出原地、更有夢想、更有目標,但唯一不變的是,任誰也不知終點到底在哪。

好了,人生旅程大概已走了三分之一。你大概會覺得累,會問自己走了那麼長的路為的是什麼、忘記了初衷、為了什麼而堅持。這個旅程出現了交叉點:前進或是原地踏步。也許幸運的你已經到達了旅程的高峰,再無所求,任由命運決定自己走向未知的終點。也許自覺還未找到屬於自己伊甸園的你,會繼續拼命地上路,為人生旅程加添更多色彩。又或者,一直獨腳的旅程演變成了二人行,甚至數人行。我們明白到其實美好的旅程不一定只可存在一人。

然後,終點好像愈來愈近,但伸手還是觸不到。不過我們不再在乎終點在哪,只需要沿途風光美麗,懂得如何享受餘下的旅程便可以。有人會選擇重回當年勇闖天下的遊歷模式;亦有人會選舉用口相傳,希望後人為自己完成未走完的路。但無論如何,旅程尚未完結。

最後,萬物皆有時,旅程似乎已經來到終點。回想整個人生旅程,不管你的我的他的是否圓滿,都不再重要了。重要的是,終究走過了屬於自己,由自己一手一腳規劃出來的旅程。

旅程真的到了終點嗎?
非也,只是我們到了另一個地方開展了另一段旅程。那個無人知曉的世界,也許比這裡更多采多姿,更無慾無求。

請深信,旅程其實並沒有終點。

獻給所有一直為自己的人生旅程而努力的人,不管你現在身在何方。

Facebook專頁:https://www.facebook.com/backpackersopoor
U Blog: 窮看世界。噢耶!

2014年9月1日 星期一

現代「港旅」十式

港女呢個稱呼已經唔記得幾時開始興起。
香港女士亦都唔知幾時對呢個稱謂避之則吉。
香港男士從此怕怕面對港女,怕同佢地出街,怕同佢地溝通,更怕同佢地去旅行。

無他,男士們認會同港女去旅行仲慘過打仗。
但!其實香港地有好多「港旅」並唔係男士想像中咁不濟!
身邊認識好多女性(包括自己)係活生生既女人豪傑!
以下係我發現男性對「港旅」既不同誤解,就等我逐一擊破!
http://blog.ulifestyle.com.hk/blogger/backpackersopoor/wp-content/blogs.dir/0/4675/files/2014/09/%E7%85%A7%E7%89%87-004.jpg
誤解一:未開始去旅行個行李箱已經爆左,因為裝滿哂化妝品、靚衫、幾對鞋
實情係:而家「港旅」都鍾意背包行,佢地唔會自己攞苦黎辛。大背包中日常用品多數都只有幾套可替換既衫褲,一對拖難(另一對已經著住左),最多加多把梳同一支lotion。化妝品?No way!

誤解二:去到當地每朝出發前要畫返塊面出黎先起得程
實情係:男士可以起身四步曲 - 刷牙,如廁,換衫,出門口,查實「港旅」只係多你1-2步 - 刷牙,如廁,換衫,搽lotion,執袋,出門口。個2個步驟最多多你1-2個字。其實唔係個個女性都有化妝既習慣!

誤解三:唔行得,唔辛苦得,只要享受
實情係:錯錯錯!「港旅」既魄力隨時好過男性。佢地會喜歡用雙腳代車,景點駁景點咁行,即使上山下海,總之有靚景睇就無問題!即使無冷氣、無得坐、無得休息,終極目標會推動佢地積極上路。

誤解四:只愛Shopping,視風景如無物,走馬看花
實情係:「港旅」愛慢遊!並唔係每位女性都只愛Shopping,並且走馬看花。其實她們更愛大自然風景、遠古名勝所帶來既震撼美。所以男士們唔好驚同親女性旅行都會一袋二袋同一味等。

誤解四:自我中心,只知香港文化而不解外地文化,失禮矣
實情係:香港「港旅」遊天下都可以好有文化修養。佢地會先了解、再體驗、後融入,然後用心欣賞異地文化,務求令每次既旅程都可以滿載而歸 - 心靈上的滿足。

誤解五:自拍成癮,自己想為風景拍攝變左龍友
實情係:並不是每位女性都愛高抄自拍。「港旅」都鍾意用大機只影景而相中無一人。我們愛收集的是,愛留下的是,旅途風光的美好回憶。

誤解六:手機當GPS,無視有心人的幫助
實情係:「港旅」會主動用把口向途中問路,因為佢地明年,interaction既重要性。要切切實實感受當地既本土文化同氣氛,最直接既就係同當地人接觸多些。

誤解七:食要食得好,住要住得舒服
實情係:你有冇見過「港旅」食只會食麵包,有得食就食。住只會住Hostel甚至做沙發客?無論你有定無,佢地的確會咁做。

誤解八:唔會陪你夜晚晚凍冰冰觀星,晨早流流未訓醒去睇日出
實情係:只要可以影到一張靚相,可以留下一輩子美好既回憶,無論過程有幾艱鉅,「港旅」都會願意做

誤解九:買咩、食咩、或者成個旅程都要你找數
實情係:「港旅」愛獨立。佢地寧願出發前死慳爛慳都要慳個旅費返黎,絕對唔會攤大手板向你要錢。因為我們都明白,得來不易同要付出的旅程,才會更刻骨銘心。

誤解十:去旅行係為左post相呃like
實情係:還是我常說的那句,人生如旅程,旅程如人生。「港旅」想要既不過係豐盛自己人生,到世界各地收集返自己散落各地的人生碎片。

或者睇完以上你會即彈一句:無可能有「港旅」!
其實香港地真係有好多真心愛旅遊既港女。

無論你係男定女,一齊去旅行都係睇雙方點樣去遷就,大家無非都係想要個開心既旅程,何必要攪到咁複雜呢?同埋,同港女去旅行並唔係大家想像咁恐怖。

拿拿拿!我亦唔否認真係有「港女旅行法」存在,但如何找尋合適旅伴就等你自己慢慢參透啦!噢耶~

Facebook專頁:https://www.facebook.com/backpackersopoor
U Blog: 窮看世界。噢耶!