2015年6月2日 星期二

係"鬼"都好?

或者好多人都覺得鬼仔鬼妹好大方,唔斤斤計較,甚至好風趣幽默,但都係個句,每個地方總會有D異類。
去旅行,特別係西方國家,見得最多一定係外國人。但亦係當中見識到鬼既陰招。 話說係阿爾巴尼亞時,漫步於Berat Castle,與一個鬼妹(其實我估佢都應該三十有多)沿途相遇好幾次,終於第N次後我地展開對話,點知我地都係住同一間hostel同一間房同一日到Berat,只係到達時間唔同。
咁巧及既情況下無理由唔一齊玩架嘛,夜晚就決定出去飲番杯。到賣單時,佢問左一句:"Can you pay for this? "我諗左諗,就講左句:"Sure!Why not? "其實兩枝酒夾埋只係十幾蚊港幣,加上我以為佢無拎銀包,開心飲無咩所謂啦。
到第二朝食完早餐都係一齊去行,見到Albania雪糕咁得意當然要試一試,俾錢當然又要拎銀包,點知佢只係望住我拎銀包,店主又係望住我做呢個動作,好!我俾!兩份雪糕!其實夾埋只係六蚊港幣都無。
到要買postcard時,又到俾錢時刻,我岩岩好一張紙幣夠俾自己個幾張,俾完自己個份後佢又望住我,問我有無散銀,佢得一張大紙。我靠!個幾張postcards夾埋都又只係港幣十二蚊,你係咪路呀。我最後答:你可以俾張大紙找架。點知最後佢拎左張細紙幣出黎,岩岩好俾到咁多張postcards。 個下真係眼都突埋,邊個去旅行想使自己錢,但都唔使計到咁絕嘛 。雖然當下已經對佢有小小不滿,但路都要走落去。
行行下佢又問我間hostel俾幾錢一晚,答完發現我訂得平過佢。其實唔出奇,因為唔同網訂價錢都會唔同,但最多可能只係相差十幾蚊港幣左右 點知番到hostel佢竟然同個老細講點解同一間房我平過佢,唔公平。 我又Dxx左聲出黎,因為個老闆聽完同佢解釋因為唔同網站問題,但個鬼妹一於懶理,最後攪到我同老闆極度尷尬,老闆當然要收番佢平D,已經唔想煩。
為左令個氣氛好D,老闆決定開音樂邀請我地跳舞,點知佢竟然又拒絕,已經令老闆唔知可以再講咩。之後點?咪只係得我同老闆兩個係度9跳囉。
我知去旅行有時係要慳得就慳,但出黎玩最緊要自己開心之餘,亦要識得顧及人地感受,大家開心就最好不過,無必要令到人地難做丫。大家都係為餐飽飯啫。
真係,唔係係"鬼"都好。
【Day 30】
如果唔係身上盤川就快用完,要趕住去補給站(巴爾幹唔係個個國家都可以係ATM拎錢),我真係想留係阿爾巴尼亞多幾日。
講真,呢度既靚境唔多,而且交通唔太方便,巴士站難搵,巴士時間難計。但呢度既人每一個都好好,總會向你投下一個親切既笑容。加上亞洲人好似對佢地黎講好少見,行過身邊總有無數個人以好奇既眼光望下你,再同你Say個Hi。最攪笑係我住個度可能左右隔離關係比較好,第二日已經成條巷知道我來自香港,亦會同我打聲招呼,感覺好似家咁。
有時,沿途風景再美亦比不上一個微笑。
received_10153034198538577